مہاراشٹر کی دینی فضاؤں کا ایک روشن چراغ بجھ گیا

آج دل انتہائی رنج و غم سے بوجھل ہے۔ مہاراشٹر کے معروف دینی و دعوتی بزرگ، امیرِ تبلیغی جماعت حضرت حافظ منظور احمد صاحب رحمہ اللہ کے انتقال کی خبر نے دل کو غمگین کردیا۔
یقیناً ان کا دنیا سے چلے جانا ایک فرد کا نہیں بلکہ ایک پورے دینی ماحول، دعوتی فکر اور اخلاص بھرے کردار کا رخصت ہوجانا ہے۔

حضرت حافظ منظور صاحب رحمہ اللہ نے اپنی پوری زندگی دینِ اسلام کی دعوت، اصلاحِ معاشرہ، مسلمانوں کے ایمان و اعمال کی فکر اور اللہ کے راستے کی محنت میں گزار دی۔ ان کی سادگی، عاجزی، نرم مزاجی اور اخلاص ہر ملنے والے کے دل پر اثر چھوڑتا تھا۔ وہ خاموشی کے ساتھ ایک ایسی عظیم دینی خدمت انجام دے رہے تھے جس کے اثرات ہزاروں لوگوں کی زندگیوں میں محسوس کیے جاتے ہیں۔

مہاراشٹر میں دینی محنت اور دعوت و تبلیغ کے میدان میں حضرت کی خدمات ہمیشہ یاد رکھی جائیں گی۔ انہوں نے بے شمار نوجوانوں کو دین سے جوڑا، نمازوں کی طرف متوجہ کیا، اور اللہ تعالیٰ سے تعلق مضبوط کرنے کی فکر دی۔ ان کی گفتگو میں درد تھا، فکر تھی، اور امت کے لیے تڑپ تھی۔

آج ان کے انتقال پر دل یہی کہتا ہے کہ:
“وہ شخص چلا گیا جو خود ایک انجمن تھا۔”

اللہ تعالیٰ حضرت حافظ منظور احمد صاحب رحمہ اللہ کی کامل مغفرت فرمائے، ان کی قبر کو نور سے بھر دے، جنت الفردوس میں اعلیٰ مقام عطا فرمائے، اور ان کی تمام دینی خدمات کو صدقۂ جاریہ بنائے۔ اللہ تعالیٰ ان کے اہلِ خانہ، متعلقین، احباب اور پوری امت کو صبرِ جمیل عطا فرمائے۔

ہم سب کی ذمہ داری ہے کہ ان کے مشن، دعوتی فکر اور دینی محنت کو آگے بڑھائیں، یہی ان کے لیے بہترین خراجِ عقیدت ہوگا۔

تعزیت و دعا گو
مسعود نعمانی
خادم: جامعه نعمانیه
کونڈوا پونے مہاراشٹر